政壇：政改表決在即 民意關注組「遣散」
九日後，政改方案便會提交立法會表決，政圈各種火併亦去到終局。由溫和政見人士組成嘅政改民意關注組尋日發表第六次民調，今次之後，佢哋亦完成咗跟進政改民意嘅工作。政改前景未定，關注組前景同樣未定，一班成員打算遲啲約個時間出嚟傾吓。
李華明（左一）話關注組已完成最後一次民調。
講到關注組嘅工作，有成員話，夾咗幾次錢，對於打工一族嚟講，都咪話唔影響生活質素。問到李華明遲啲約埋傾乜？佢話，要跟進吓最後嘅事務，仲講笑話譬如「遣散」自己。
佢哋一堆有心人走埋一齊做咗咁多次民調，究竟對政改發展有冇作用呢？肥仔明坦言，佢哋發表民調後，都會將結果送交政府同立法會議員，佢仲有啲無奈話：「我都唔知佢哋有冇睇，冇得逼人嘅，但民意係點已經畀佢哋知囉！」
