政壇：陳家強以股論政盼奇迹
政改方案好快就要表決，政府團隊繼續呼籲支持。財經事務及庫務局局長陳家強尋日發表最新網誌，佢喺文中以股市論政改，話股市暢旺時會出現好多流於簡單及口號化投資理念，投資者忽略基礎分析而盲從片面概念入市，容易招致損失。佢仲話，概念「要落地」，社會才能夠向前走。依家係抉擇時刻，希望立法會能夠作出符合香港整體利益嘅選擇。其實，若要以股喻政，估計佢最期望表決日出現「大奇迹日」，即大家睇淡時，形勢卻忽然大逆轉。
設計圖片及對白
陳家強最新網誌以「從概念回歸現實」為題，指股市暢旺時，會出現好多流於簡單同口號化嘅投資理念，投資者每每坐言起行入市，冇掌握與所持有股票相關的資訊，往往「跟大隊」行事，同一時間投資風險亦不斷增加，到咗股價估值漸漸脫離現實，股市嘅調整就無可避免。
社會向前需概念「落地」
佢其後就筆鋒一轉，講到政治市場角力也有相似之處，指複雜政治論述往往難以明白，爭辯雙方分歧背後亦各有考慮，唔係人人願意花時間理解複雜嘅政治論述，而每次選戰或出現重大爭議時，各政治力量以簡單易明嘅口號，搶佔道德高地，訴諸大眾嘅情感，以便動員並擴大支持。
本身係學者出身嘅陳家強仲將投資市場比喻政改，認為再火熱嘅板塊都有冷卻嘅一日，再激烈嘅選戰同政治角力都有回歸平淡嘅時候，激情過後，就可能發現理想同現實時有落差，而立法會即將表決政改方案，希望社會冷靜思考現實，民主社會要進步，概念就「要落地」社會才能夠向前走。究竟香港政改會否如同股市一樣，出現政治「大時代」，下周中自有分曉。
