虐老醜聞爆不停 皆因港府欠承擔

其實仲使乜研究吖，涉事院舍逼長者剝光豬等沖涼，有相有片，證據確鑿，吟詩都吟唔甩，上訴都係嘥氣嘅啫。再講吖，老人家畀人咁樣虐待，即使院舍唔釘牌，係人都走夾唔抖，點會仲有人幫襯吖。呢，今次受影響嘅五十幾位院友，絕大部分已經搵到地方搬，走得快，好世界吖。

話時話，私人院舍烏煙瘴氣，亂象叢生，今次醜聞只係冰山一角，家陣最重要係亡羊補牢，加強監管。正如有區議員話齋，社署巡查制度漏洞多多，話就話突擊巡查，其實好多時院舍一早就收到風，事先洗定太平地，巡查淪為做騷。雖然社署否認有人通風報信，強調上年度巡查院舍超過四千七百次，發出三百多封警告信，但講者自講，根本冇人相信姿勢多過實際嘅巡查可以發現問題。

好簡單，如果社署官僚做好自己份工，院舍虐老醜聞就唔會長爆長有喇。淨係涉事嘅大埔院舍咋，社署過去五年就發出十五封警告信，最後咪又係不了了之。係人都知，政府資助宿位供不應求，社署對違規院舍拉人封舖容易，點樣安置老人家至係大問題，官僚抱着多一事不如少一事嘅心態，咪隻眼開隻眼閉囉。

冰凍三尺，非一日之寒，安老已經係老問題。目前輪候資助宿位平均要等三年，私營院舍不失為另一個選擇，而當局亦預留咗八億元，原定今年九月起向長者派發服務券，希望藉「錢跟人走」提升院舍質素，點知人算不如天算，今次虐老醜聞令輿論嘩然，當局為免火上加油，惟有叫停。咁又係吖，私營院舍質素良莠不齊，當局唔加強監管，推出院舍券盞添煩添亂嘅咋。

講真，監管私營院舍辦法好多，關鍵係港府有冇心啫。有人建議引入第三方評審機制，加入扣分制；有人建議參考外國設立「個案管理員」，監察長者健康同生活狀況。呢啲建議都值得港府考慮。

講到底，港府坐擁金山銀山，大可直接增加資助宿位，淨係機場三跑嘅造價，已夠全面資助長者宿位十二年。基建工程延誤超支，港府眼都唔眨一下，增加對長者承擔就耍手擰頭，唔怪得畀人話善財難捨，冤枉甘心喇，叮！