城中鏡：陳繁昌勉學生北闖開眼界
現代專上教育好重視實踐同實驗，大學都紛紛加設一啲在學體驗及實習計劃，等大學生開多啲眼界。科技大學校長陳繁昌尋日出席科大滬港明日領袖實習計劃啟動禮時，鼓勵即將到上海實習七星期嘅三十三位科大學生，趁機會深入了解上海同埋內地嘅發展。
陳繁昌（左）同李可莊（右）攜手推動科大生北上實習。
上海同香港嘅雙城之爭，鬥得難分難解，呢批科大生可以早啲去上海歷練吓，實在係知己知彼。陳繁昌話，滬港喺金融、航運及物流各方面發展都好出色，記得一九九○年佢到上海時，喺上海灘望過浦東，只係一片空地，依家已今非昔比，可見上海嘅發展幾咁迅速。滬港青年交流促進會主席李可莊就話，佢哋主辦北上實習計劃已經第七年了，往年都係資助香港大學學生，今年首次擴大至科大，希望畀更多港青到內地知名企業實習。
