炎夏到，台灣駐港機構尋日空運靚生果到港，並舉行一連十二日嘅特賣會，知唔知港人去年喺食用進口生果入面，花最多錢嘅係乜？原來係俗稱提子嘅葡萄。主辦機構台北貿易中心主任孫至誠話，去年本港入口三百幾億元嘅生果，其中葡萄入口貨值排第一位，有成三十五億元咁多。

嚴重光見到產自家鄉的巨峰葡萄，諗起唔少讀書時趣事。

李大壯（左）及孫至誠分享食生果心得。

李挺（左）及陳錦泉係引入台灣生果及食品嘅重要推手。

台商辦特賣會推介

係呢次台商辦嘅特賣會中，家族做果欄生意嘅香港青聯會董李挺話，其實過往市民食得最多嘅未必係葡萄，只係因為去年秘魯葡萄大豐收，又平又靚，識食又識計數嘅港人又點會錯過呢？特賣會現場就有台灣彰化盛產嘅巨峰葡萄，台北經濟文化辦事處處長嚴重光見到，即勾起唔少回憶。佢自稱係彰化人，讀高中時曾經到同學屋企嘅葡萄園玩，大家坐喺葡萄架下一邊抖涼，一邊摘葡萄食，諗起就好爽。

「台灣女婿」港台商貿合作委員會主席李大壯都有到場，佢最鍾意食台灣番石榴，幾乎每日食一個。

最近佢聽聞超市有冷藏台灣冠軍牛肉麵賣，於是着太太去買，但結果佢冇得食，事關佢嘅體重雖已比高峰期減咗六、七十磅，但仍未達標，結果嗰碗香噴噴嘅牛肉麵就畀咗阿仔食喎。

第一手消息請下載on.cc東網iPhone/iPad/Android/Windows Phone Apps