有團體早前揚言會喺立法會審議政改方案時包圍立法會，立法會秘書處尋日就喺大樓大堂，向傳媒簡介安檢設施。期間，開完會嘅議員涂謹申（阿涂）同工業界議員林大輝經過大堂，大輝就自告奮勇去「被安檢」，但阿涂就話自己實過唔到關，唔肯做測試，結果被大輝笑佢︰「你鐵石心腸吖嘛！」

林大輝（圖）主動試用立法會金屬探測裝置，但涂謹申就企埋一邊唔敢試。

話說大輝同阿涂經過大堂時，見到一班記者喺度了解緊安檢安排，於是就走埋去趁熱鬧，大輝更行埋去部X光機度，擺低手上嘅保溫杯、手錶、電話等。不過，當佢好得戚咁行過金屬探測門時，金屬探測門就亮起紅燈。阿涂見狀就笑言︰「你體內有乜呀！」面露尷尬神色嘅大輝就指住自己個口，笑笑口咁話︰「我有鋼牙！」

大輝自告奮勇「過機」，但阿涂就扭扭擰擰。在場記者問企到離X光機成幾米咁遠嘅阿涂，點解唔試下安檢設施。佢就話︰「我實pass（合格）唔到。」唔通佢身上有違禁品？

第一手消息請下載on.cc東網iPhone/iPad/Android/Windows Phone Apps