政壇：搞搞政：雨傘團體屢內鬥瀕瓦解
佔領行動之後，本地政圈多咗唔少新組織，今年初先成立、主打本土路線嘅「青年新政」都被視為雨傘團體之一，不過，佢哋未出戰區議會選舉就先出事，短短半年間，已經由成立之初嘅逾百人，走咗二十幾個成員，其中一個更加係有意參選嘅核心成員，已宣布退出嘅青年新政成員張文龍日前喺社交網站上載退出組織嘅聲明，狠批組織搞內鬥。呢個組織同其他佔領行動後瀕臨解散嘅組織，如學聯等一樣，究竟問題出喺邊呢？
（設計圖片及對白）
打壓異己 核心退出
張文龍批評組織內部管理不善，部分核心成員「打壓不合自己胃口、但其實有用的意見」，忽視內部出現嘅結構性問題，更只顧「去瘀血、清理門戶、搞會內鬥爭」，實在愚不可及。青年新政年初成立嗰陣聲勢浩大，更表明劍指立法會議員葉國謙、梁美芬等「大佬」，但之後幾個月似乎雷聲大、雨點小。有前成員話，青年新政當初拉雜成軍，唔熟選舉部署之餘，黨內核心仲玩小圈子，睇唔到組織前景，所以退出保平安。
人稱「巴治奧」嘅青年新政召集人梁頌恆承認，可能組織太新，冇經驗亦唔夠時間，所以予人感覺內部管理不善，但就唔覺組織有內鬥或打壓意見。另外，早前積極發起退聯嘅中大本土學社召集人劉穎匡亦預告「七一」退出，唔通呢班佔領行動後冒起嘅組織都係來得快，去得快？
