政壇：高盛總裁靠「吹」發迹
十隻手指有長短，人嘅技能亦如是，高盛總裁科恩（Gary Cohn，圖）有閱讀障礙，曾經畀人當傻仔，甚至連老師都同佢父母講，話科恩將來做到貨車司機都算好彩囉。點知，今時今日嘅佢係投資巨企嘅總裁，年薪成一億七千萬港元。
科恩（Gary Cohn）
科恩話，佢早有心做金融業，但大學畢業後，冇乜面試機會，為免賦閒家中畀老竇煩，就搵份推銷窗框嘅工做住先，但佢心中嗰團金融火，從來冇熄過，有次，佢趁去紐約出差嘅機會，偷偷去咗商品交易所，仲企正喺交易樓層門口添，當時諗住識番個人，然後自薦搵份工，可惜企咗幾粒鐘，乜都冇。收市時，科恩頭耷耷打算返歸，有個身光頸靚嘅西裝男一路叫喊「遲了，要趕去機場」，一路衝進電梯，科恩追住西裝男，話自己都要去機場，不如一齊夾份，咁就成功跟埋上的士。
西裝男原來喺間經紀行管期權買賣，程車塞咗四十五分鐘，科恩就猛推銷自己幾想要份金融工，仲拍晒心口話自己乜都識，連期權都識，結果獲得一個面試機會，科恩趁周末搏命咪熟本「期權聖經」，結果星期二、三面完試就得咗。做咗幾年後，就畀高盛挖角。無錯，科恩係由吹開始，但之後立即搏命搵料充實番自己，唔係好難坐穩個位二十幾年呀。
