政壇：大學生燒《基本法》 支聯會人財兩失

六四晚會係支聯會同各黨派籌款嘅黃金機會，但支聯會副主席蔡耀昌尋日朝早接受電台訪問透露，今年捐款比過往少咗大約三十萬元，佢事後翻查數字，去年籌得一百七十多萬元，今年就只籌到一百三十萬元左右，應該係少咗四十幾萬元至啱，跌幅達兩成幾。問到係咪同學生燒《基本法》有關，佢只係話人數跌咗兩成幾，同捐款嘅跌幅差唔多，而且部分環節嘅時間比預期長，令集會唔能夠如預期喺十點前結束，唔排除因為咁令到參加者提早離場。

支聯會唔見錢，但各黨派嘅籌款金額都比去年增加，社民連同公民黨成為最大得益者，前者今年籌得二十五萬元，較去年嘅十三萬元急增十二萬元，後者就有二十九萬元，較去年多八萬元。社民連立法會議員梁國雄仲話，今年嘅「紅衫魚」（一百元紙幣）特別多。另外，工黨亦籌得九萬多元，較去年多一倍。