政壇：嫻姐助懷仔恐一鋪清袋
政壇中人一着走錯，後果可能好嚴重。縱橫政界多年嘅工聯會立法會議員陳婉嫻（嫻姐）近日就老貓燒鬚，佢早前幫匿藏香港九年嘅無證男童懷仔，事前大鑼大鼓開記者會，企圖向入境處施壓，協助懷仔爭取居港權，點知事件嘅發展完全相反，各種負面消息不絕，社會反彈極大，結果不但嫻姐嘅議辦被示威團體踩場，連工聯會喺未來兩場大選舉嘅選情，都可能受影響，再落去，真係唔知經營多年嘅政治老本會唔會一鋪清袋？
懷仔事件揭發後，唔少港人認為不能開壞先例，更唔應該違反法律，而且記者會咁高調，不滿聲起之後，懷仔同外婆住嘅公屋都有人抗議，搞到佢哋兩婆孫要搬開避風頭，讀書、居港權都問題多多。日前，懷仔終於自願遣返，外婆更聲稱，後悔搵陳婉嫻幫手喎。
不過，懷仔事件裏邊被揭咁多大話，嫻姐會唔會怨被人呃咗呢？佢冇再開腔講呢件事，但佢嘅工聯會好友就話，嫻姐都有向佢「呻」，話承受很大心理壓力，而且，件事曝光後，情況根本始料不及。咁嫻姐佢哋以記招方式處理事件，係咪過分高調呢？工聯會好友就話，嫻姐一向有同情心，待人真誠，原本係希望開記招，令政府部門特別重視事件。
