政壇：靚女牙醫插旗對撼乳鴿
中西區區議員許智峯一直係「替補」白鴿黨友立法會議員單仲偕嘅大熱之一，但明年如若希望更上一層樓，睇怕要先避過畀女牙醫「剝牙」，皆因許智峯嘅中環選區，近日有位靚女牙醫劉尉欣（Vienna）頻頻亮相，宣傳旗幡、橫額周街掛之餘，據知Vienna更獲區內建制派力捧，誓要踢走許智峯呢隻乳鴿。
劉尉欣愛狗如命，家有兩隻領養唐狗同一對愛貓。（受訪者提供圖片）
許智峯當選後，大鬧區議會嘅事件簿成尺咁厚，最出名莫過於去年玩轉區議會小組會議，最後搞到報警收場而鬧出「名堂」，但佔領行動後，激進派吸票力強，佢嘅激進形象分分鐘幫佢打穩區選陣腳，建制派亦不敢怠慢，搵牙醫出身嘅Vienna打對台。
Vienna出任中區街坊福利會牙醫顧問多年，冇政黨背景，仲係愛狗之人。佢身兼南丫島動物保護組織幹事，同區內嘅單身、專業、高收入街坊特別啱嘴形，蛇齋餅糉都可以收埋一邊。Vienna笑言，選區內單身貴族多，佢亦認識唔少單身醫生朋友，若果搞speed dating（極速約會）相信好有市場。唔知Vienna可唔可以極速掃走隻乳鴿呢？
