政壇：政改民調較勁 蔡堅惡鬥史泰祖
香港醫學會尋日公布醫學界對政改方案嘅最新民意調查結果，支持同反對方案嘅人數接近，受訪註冊會員只有兩個百分點之差。醫學會會董兼前會長蔡堅話，民調可以為醫學界立法會議員「怪醫」梁家騮否決方案撐腰，怪醫應該跟民調投票喎。不過，會長史泰祖就唱反調，話怪醫係唔需要一定要跟。佢哋兩個拗手瓜，對梁家騮有冇影響暫未知，但有傳蔡堅同史泰祖都會喺明年立法會選舉，角逐醫學界嘅議席，呢次只係打場前哨戰。
（設計圖片及對白）
唔支持佔多
醫學會公布嘅政改民調結果，喺六千六百幾位受訪註冊西醫及牙醫中，百分之四十七點四表明支持方案，唔支持嘅有百分之四十九點七。佢哋亦向學生會員收番四百幾份問卷，當中一成七人支持方案，唔支持嘅就多達七成九。
對於業界反對政改方案嘅聲音佔多數，本身屬建制派嘅史泰祖就話，數據只係供政府同議員參考，怪醫都唔需要一定要跟民調結果投票。
對於學生會員大比數反對政改方案，佢就強調學生唔係業界選民，又話學生嘅睇法較「純真」，大人就會多利益考慮，政治係討價還價，大家都希望可以向前行咁話。
不過，一向同史泰祖唔多咬弦嘅蔡堅就再同史泰祖唱對台戲，首先賣口乖話民調結果反映香港醫生係有腰骨、正直、唔自私，又話對學生會員嘅調查結果好高興，因為顯示香港係有將來。佢仲明言議員應該要跟業界意見投票添。
