民航混帳數不完 醜聞處長何時叮
風水輪流轉，以前內地係貪官天堂，家陣第五代大力反腐，貪官惶惶不可終日。反觀向以廉潔見稱嘅港府，近年貪官庸官輩出，搞到烏煙瘴氣，淨係民航處處長羅崇文咋，醜聞多多，簡直厚過電話簿。
嗱，本報前年起獨家踢爆民航處連串大花筒及管理不善醜聞，審計署跟進調查，而立法會政府帳目委員會繼今年二月「痛斥」羅崇文故意疏忽職守後，尋日再就民航處採購嘅空管系統嚴重延誤發表調查報告，除咗再度「痛斥」，仲罕有咁「強烈譴責」佢公然疏於履行責任及職責，未有確保空管系統合約已徹底審查，搞到得物無所用，浪費巨額公帑。
係咁嘅，民航處花費逾十五億元更換空管系統，本來預計一二年底啟用，點知其中一份合約出現重大延誤，而舊有系統嘅部分組件又於一二年停產，驗收測試出現大量問題，結果一延再延，最快明年上半年至可以投入運作。咁仲唔止，有關延誤令民航處每年額外花三千多萬元維修，唔向供應商追究之餘，仲自己貼錢，唔怪得帳委會報告表示「震驚」同「不可接受」喇。
正如立法會議員話齋，香港作為國際航空中心，空管系統嘅安全非常重要，稍有甩漏，隨時造成人命及財產損失，絕對唔係講玩。民航處明知有關系統掣肘多多，唔適合香港使用，依然堅持購入，你話奇唔奇吖？去年傳媒踢爆，有份審批標書嘅民航處高層，事後加入系統供應商嘅香港分判公司工作，如果話純屬巧合都冇人信喇。
冇計喇，上樑不正下樑歪，自從羅崇文出任處長後，民航處就七國咁亂，烏煙瘴氣。呢，淨係擅自將民航處大樓改建成豪華娛樂城，有齊私人浴室、舞蹈室、豪華Ｋ房等等，供自己及太太享用，已經令人嘆為觀止喇。最離譜嘅係，醜聞被踢爆後，有人仲不知收斂。早前本報再次踢爆民航處將部分擴建地方闢作太極班場地，而羅崇文太太正正係享用者之一，呢啲咪叫做死性不改，一錯再錯囉。
講番帳委會嘅調查報告吖，用詞空前嚴厲，拍得住前廉政專員貪湯。正如有人話齋，羅崇文咁嘅貨色喺私人機構一早炒得，仲邊有可能印印腳做處長吖。帳委會報告就講得啱嘞，運房局未有履行監督角色，責無旁貸。嗱，當局講過會對有關人等進行紀律處分，唔好得個講字吖，叮！
