SUN揭秘：荔園威哥馴獸以命博命
第一位亦是唯一位的港產馴獸師蕭國威，二十一歲起於荔園馴服過不少令港人熟悉的猛獸，包括金錢豹「Lemo」以及大象「天奴」。「豹、獅子、老虎、大笨象，呢啲猛獸都畀我馴服到，係我最自豪嘅事。」期間他被豹咬過，被黑熊打到吐血，死過翻生，但現年七十五歲的威哥卻指，「猛獸最忠心，佢哋唔會出蠱惑，一畀你馴服就會黏你、嗲你，要你錫佢哋。」
「猛獸最忠心，佢哋唔會出蠱惑。」
威哥威慈並重，跟猛獸度過多個年頭。（黑白圖片/受訪者提供）
威哥笑指天奴很有靈性，識聽人類說話。（資料圖片）
荔園是不少港人的集體回憶。（資料圖片）
本月底荔園短暫回歸，勾起港人歡樂回憶，特別是大象天奴。一手訓練天奴乖巧面對群眾的威哥笑語：「天奴好有靈性，識聽人講嘢。」當年威哥手執鞭子，令猛獸貼貼服服的，是一套先硬後軟的攻勢。他說：「你威勢一定要比佢哋強，大聲一喝，等佢哋知道邊個係主人，之後先可以表達關心，摸吓佢哋、呵吓佢哋。」膽大，是必要元素，威哥自言年輕時眼明手快，就算困在鐵籠與猛獸獨處，都未曾膽怯。
修讀動物學 師承馬戲團主
那份過人膽識，源自他對猛獸的了解。修讀過動物學課程，曾跟隨四、五十年代紅透東南亞的著名馬戲團團主沈常福學師，威哥能解讀猛獸思維。他說：「點解大象成日都驚驚青青，因為佢哋眼睛構造，會睇落啲人好大隻，相反啲獅子老虎會睇到啲人好細粒，所以唔驚人。馴獸師威勢要再強啲，當佢哋願意服從你時，佢哋就會處處維護你。試過拖黑熊出外畀觀眾見，有人向我喝倒采，隻黑熊即挺身，向喝倒采的人張牙舞爪作勢一番。」
不過對於初來埗到的黑熊，威哥接觸牠們時，就是要以命博命。曾有初到的黑熊轉籠時想趁機逃走發難，「對待黑熊一定唔可以企喺佢前面，恐防佢襲擊，點知我企喺佢身邊，諗住扯住佢隻耳拉番佢入籠時，佢就將我扔到佢前面，一掌將我打到十米咁遠，雖然有驚有險都捉到佢，不過我睇醫生時都吐緊血。」
嚴厲不殘暴 安撫代替懲戒
但最驚險一次，莫過於對付金錢豹一役，「有次我爸爸想同隻豹影相，我話隻豹唔識你會咬你，點知阿爸都係走咗入獸籠，隻豹即刻撲過去。我抓住豹尾一扯，隻豹一痛就回身咬咗我大腿一啖。」他用手勢形容當時傷口就達二十厘米長。
以為威哥立即會懲戒金錢豹？可能金錢豹都是這樣想，立刻躲在一旁。不過，這時威哥忍住痛走過去，摸摸金錢豹的頭，說：「乖，你趴喺度就啱啦。」他解釋：「猛獸都懂事的，你要畀佢知道你明白佢，知佢唔係有心，仲關心佢。」
嚴厲跟殘暴不同，就是這一份嚴厲的愛，令威哥與猛獸於荔園同行多個年頭。本月底，再次迎來賓客的荔園，會在園內展示他昔日的馴獸師牌照。威哥滿足說：「荔園為大家帶來好多歡樂回憶，我都係其中一分子，哈哈！」
