城中鏡:周三列假期 鍾志平講笑想人人開心
由香港提升快樂指數基金(基金)同生產力促進局合作推出嘅「開心工作間」推廣計劃,尋日舉行頒發標誌典禮,生產力促進局主席陳鎮仁話大家都以為周一係每星期之中最唔開心嘅日子,但外國有調查顯示係周三至啱,事關周三距離上一個同下一個周末最遠喎。
鍾志平(左二)妙想天開建議將周三定為公眾假期。
吳宏斌(右)同陳國民已落注賭政改能否通過。
開廠嘅史立德(右起)、楊志雄同陳明耀都係獲頒開心標誌嘅企業家。
基金副主席Roy鍾志平聞言即搞笑話,既然打工仔咁唔開心,不如將周三訂為公眾假期,咁就變成一星期中最開心嘅日子喇!佢一向鍾意講笑,所以坐喺台下嘅勞工及福利局副局長蕭偉強都笑完就算,唔使同佢認真。蕭偉強致辭時仲賣口乖,話勞福局局長張建宗因要到立法會而未能出席,相信佢會享受出席典禮多過坐喺立法會。
出席活動嘅仲有基金主席吳宏斌、會長陳國民、副主席楊志雄、榮譽會長史立德同陳明耀等人。講到韓國爆發新沙士疫情愈趨嚴重,個個都話暫時唔去韓國玩。
為政改開盤盼通過
史立德話舊年佢同太太去過韓國兩次,對當地嘅文化創意印象唔錯,原本計劃今年再去,但依家都要取消。吳宏斌就連長途機都唔搭住,事關機艙內空氣循環唔好,幾百人困住十幾個鐘,被感染嘅機會大好多。
佢哋亦好關心政改能否通過,成班吹水老友已經開咗賭盤,暫時係一賠二,賭會通過嘅人少。陳國民話雖然大家認為被否決機會大,但心中都想通過,所以到時就算輸咗請食飯,反而仲開心。