政壇：梁君彥爭到賣麵餸 解立會拉布危「飢」
依家立法會日日受「拉布」困擾，議員好多時都唔得閒出去食飯，只敢喺立會宴會廳或到五樓咖啡室搞掂三餐。不過，立會咖啡室通常得麵包、三文治或餐蛋麵呢啲簡單食物，想食好少少都唔得。行政管理委員會副主席Andrew梁君彥為咗同事口福，早前決定為咖啡室引入一系列「車仔麵」餸，大受議員歡迎。
梁君彥成功爭取引入一系列「車仔麵」餸到立法會的咖啡室。
雖然咖啡室有熱辣辣嘅餐蛋麵供應，但如果議員趕時間開會，要食晒成碗麵又好麻煩。所以Andrew就建議咖啡室引入車仔麵餸，例如魚蛋、貢丸、腸仔、墨魚丸，連茶葉蛋都有。呢啲嘢唔係乜嘢矜貴食物，但勝在一早煮熟晒，一落柯打就有得食，又快又飽肚，方便班議員食幾啖就趕番落去投票。雖然車仔麵餸大受歡迎，但聽講女議員覺得太過「麻甩」，好少叫呢啲食物，反而鍾情厚多士。
