南韓疫情瀕失控 香港把關不能鬆

呢，南韓新沙士確診患者已增至二十多人，當中兩人死亡，證明疫情進一步擴散，瀕臨失控邊緣。難為南韓當局之前仲好口響咁話，冇出現「三手感染」個案，結果自打嘴巴，兩名新增患者正正係第三層感染。當地官員見勢色唔對，又拍晒心口聲稱，患者只係局限於醫院感染，唔會出現社區爆發喎。聽住先好嘞，到底係點，仲要睇過至知。

其實，南韓上月中已出現感染個案，點知當地政府漫不經心，發放訊息封閉混亂，導致疫情一發不可收拾。最離譜係，上星期一名南韓男子隱瞞病史，由首爾過境香港前往內地，結果確診受到感染，簡直係不負責任，害人害物，中港兩地暫未出現感染個案，只係不幸中之大幸咋。

大家睇到嘞，今時今日全球一體化，一個地方爆發疫症，隨時拖累全世界。要阻止疫情擴散，公開訊息係不二法門，遮遮掩掩只會適得其反，○三年沙士就係最好例子喇。可惜吖，人類永遠唔識吸取教訓，總係不斷重複犯錯。食衞局局長高永文係咁講嘅，南韓當局拒絕提供更多疫情訊息，連患者喺邊間醫院接受隔離都唔肯透露，有冇再荒謬啲吖。

新沙士殺到埋身，唔係講玩o架，有香港醫生到南韓作醫學交流後發燒，雖然測試對新沙士病毒呈陰性，但已令人抹一把汗嘞。食衞局決定提升感染控制措施，加強入境檢測，若有入境人士出現發燒徵狀，檢疫人員會查問對方有否到過中東等疫情地區，而來自南韓人士若出現發燒，並到過當地醫療機構，就會被視為懷疑個案，即時送往醫院檢查。高永文強調，旅客如果隱瞞病史，提供不實訊息，已經係犯法。

冇錯嘞，防疫寧緊勿鬆，措施再多再嚴都不為過。不過咁，查問旅客病史仲未夠o架，主動做好把關先係最重要。上次南韓男子之所以能夠成功入境，除咗因為對方隱瞞病史，仲因為機場檢疫人員求求其其，把關不力。所以話，作為第一道防線，口岸檢疫人員冇心冇肺，麻痹大意，隨時好大鑊o架。點都好啦，家陣香港立立亂，經唔起疫魔侵襲，唔該港府打醒十二分精神，千祈唔好重蹈沙士覆轍吖，叮！