城中鏡：葉建源寸爆馮煒光 籌款玩抽水
話說香港家庭教育學院日前舉行以「傳承」為主題嘅五周年籌款晚宴，學院主席兼鴻福堂執董司徒永富仲請咗力撐政改「袋住先」嘅政府新聞統籌專員馮煒光、立法會前議員「肥仔明」李華明同黃成智出席。咁啱得咁蹺，馮、李、黃三人同學院總監狄志遠都係前匯點成員（白鴿黨前身），有緣聚首，但揚言否決政改嘅立法會教育界議員葉建源就唔多畀面，即場寸爆馮煒光嘅「三個字」政治笑話。
葉建源（左一）即席揮毫，寸爆馮煒光「三個字」政治笑話。
李華明（左起）、黃成智、狄志遠同馮煒光都係力撐「袋住先」嘅前匯點成員，難得聚首。
胡曉明（左）細個食慣「藤條炆豬肉」，右為太太梁子慧。
胡曉明認同體罰
身兼學院董事嘅葉建源當晚即席揮毫籌款，一拎起支毛筆就話要寫「三個字」，點知最後寫咗「海濶天空」四個字，明寸於台下曾爆出金句「三個字：不予置評」嘅馮煒光。馮煒光咁樣被寸，由頭到尾「唧」都唔笑、木無表情，反觀葉建源同台下觀眾就笑得好開心。
講番籌款晚宴嘅主題「傳承」，肥仔明就好幽默話最明顯係佢傳承咗自己個身形畀寶貝女，但好在女兒減肥功力青出於藍，近日收身成功。
同場又見城市大學校董會主席胡曉明，佢回憶童年時，話爸爸好錫佢，反而媽咪角色就相對嚴厲，間中仲會請佢歎「藤條炆豬肉」添，但佢冇嬲，反而認為小朋友喺未懂事前，適度體罰可以令佢哋知道痛及錯喺邊。
雖然當晚咁多政界人物出席，但竟然大家都隻字不提政改，唔通真係無乜好講？
