政壇：「金勞詹」轟廖暉不作為
立法會金融服務界前議員「金勞詹」詹培忠雖然近年好少露面，但依然搣唔甩「潮州怒漢」外號，一講嘢就對準目標發炮。金勞詹尋日出席青年工業家協會政改論壇，席上炮轟國務院港澳辦前主任廖暉對政改困局有不可推卸責任，又話政改諮詢係一場戲喎。
金勞詹話回歸十八年嚟，政改困局最大責任就係港澳辦，批評廖暉擔任主任以來，只係陪同過領導人來香港，未試過親自來港，如果係咁「一係唔好做」。佢舉例話，一間工廠老闆唔喺工廠，班伙記又點有歸屬感呢？佢認為，正因為港澳辦不作為，搞到港人唔認同國家收回香港，被泛民主派一直食「六四」老本，食到依家。
佢又話特區政府都係幫兇，冇提供下台階畀泛民，即係要泛民跳落深淵，「死梗又點會跳？」佢質疑有人出口術，話要撬泛民十三、四票，其實就係想本來同中央有得傾嘅泛民綑綁否決。不過，佢話如果泛民喺立法會選舉，冇將承諾否決政改作為政綱，今次否決政改就係剝奪選民權利，欠選民一個交代。最後佢都話，有五、六票若因得到目的，而轉軚支持政改都唔出奇，但機會微咗啲囉！
