「建仔」民建聯一向於網絡世界「被關注」，網民不時惡搞或冷嘲熱諷該黨議員言論，最近該黨發現被偽冒電子郵件及電郵網站，據知已就此事報警，又會保留追究法律責任的權利。

建仔尋日發表聲明，話早上發現一封主旨為「最後警告」電郵，要求收件者點擊電郵內連結，進入偽冒建仔嘅電郵網站，企圖套取用戶及電郵資料。聲明又話，偽冒網站設計同該黨已停用嘅網上電郵登入版面相同，佢哋嚴正聲明該電郵非由該黨發出，而電郵內連結版面亦停用多時，已將有關情況知會警方。

除咗今次被偽冒電子郵件及電郵網站，約喺一個多月前，該黨立法會議員譚耀宗嘅個人網站被自稱「伊斯蘭國」組織入侵，包括新增一幅「伊斯蘭國」成員持槍嘅照片，唔知該黨會否趁機全面檢視，或者提高佢哋網站嘅安全系數呢？

第一手消息請下載on.cc東網iPhone/iPad/Android/Windows Phone Apps