炎炎夏日，無論男女都鍾意「短打」上陣，但立法會議員「長毛」梁國雄舊年夏天就因為着短褲出席大會，而被主席曾鈺成裁定唔莊重，焗住換番條牛仔褲，先可以繼續開會。

謝偉俊一身西裝襯短褲造型，佢話潮流味比較濃。

不過，尋日撞到着短褲仔嘅Paul謝偉俊現身立會，見佢一身迷彩短褲襯帆船鞋，相當型佬，但唔怕又畀委員會主席「裁決」咩？

阿Paul笑言，呢身造型對比長毛fashion（潮流）味比較濃，仲潮流教父上身咁話，今年潮興西裝襯迷彩短褲，佢好鍾意咁着，唔怪得同長毛比較係唔同味道。佢仲透露，之前已經試過趁星期六開會，靜靜雞着兩、三次短褲開會，好彩冇被委員會主席當場捕獲，亦冇議員投訴，但就話唔敢着去開星期三大會喇！

除咗長毛同Paul，其實着短褲進出會議廳嘅有范國威，舊年因為撐「短褲」長毛而專登換番條「短打」出席大會，但冇再畀人投訴，唔通真係着得型就夠莊重？

第一手消息請下載on.cc東網iPhone/iPad/Android/Windows Phone Apps