政壇：沙士時期高球旺 朱鼎健因疫得福
南韓出現「新沙士」嘅疫情恐有蔓延之勢，引起大眾極度關注。講起○三年沙士疫情，好多行業都大受打擊，但觀瀾湖集團主席兼行政總裁Ken朱鼎健話，好多人都以為高爾夫球業務同樣受挫，但實情係相反，當年沙士期間，估唔到旗下業務仲好咗，可以話係加速咗十年發展咁滯。
朱鼎健話當年沙士並冇打擊其公司嘅高球業務。
回想十二年前沙士爆發，阿Ken慶幸冇受波及，猶記得當年大家冇乜事都唔敢出街，至於室內同朋友嘅聚會或娛樂，更係可免則免。不過，打高爾夫球則係室外活動，一般喺非常大同空曠地方進行，所以空氣都特別清新，加上打高球可以鍛煉體魄，唔知係咪因為咁，所以仲多咗人去參與高球運動。
不過，海南島每年都有成六位數字韓國遊客到訪，當中唔少嘅遊客仲會到訪旗下嘅高球場，所以阿Ken都話要預備定多啲口罩、酒精消毒搓手液等相關防疫嘅工具。
雖然現時大眾嘅衞生意識都已經提高，而且韓國旅客多數冬天先到訪，但防患於未然，點都有需要嘅。
