政壇：「慳妹」設計師元創方圓夢
推動本地創意、協助年輕設計師創業嘅PMQ元創方，眨眼就一周年，尋日叫齊方內一眾開業一年嘅老闆，舉行另類生日派對。雖然冇蛋糕切，亦冇蠟燭吹，但設計師就分享搞創意產業心得。時裝設計師Chailie何裕釵認為，本地不乏拚搏、敢於追夢嘅創意人才，有條件打造成「香港東大門」。
何裕釵期望元創方有天會像首爾東大門一樣。
PMQ元創方總幹事曾昭學（中）與一眾本地設計師黃漢邦（右起）、吳鎮麟、何裕釵及張雅婷（左起）、楊卓勳、李綺婷、謝家盈齊慶祝一周年生日。
盼有如首爾東大門
進駐元創方嘅過百位設計師，各有辛酸嘅創業故事。「超級慳妹」Chailie十六歲開始狂做兼職賺學費，二十三歲儲夠錢，入讀英國倫敦時裝名牌學府Central Saint Martins College of Art and Design，畢業後回港創業，敲門寄賣貨品，卻吃盡閉門羹。年前終於喺元創方開店，卻因為冇錢裝修，要自己動手髹牆，又買來舊水晶粒燈，翻新再用。如今守得雲開，Chailie開始為藝人、明星做衫，佢期望元創方有天會像首爾東大門一樣，成為國際買家採購原創產品嘅集中地。
追夢嘅仲有年輕建築師Otto吳鎮麟，兩年多前畢業於港大及美國麻省理工學院建築系，與兩位好友喺方內開設計師樓。
原以為做老闆可享受更多私人時間，誰知開店後，忙足一年都無假放，但最終有機會替名店及豪宅做室內設計，算是苦盡甘來。
