政壇：檢討網絡罪行 泛民輸得慘
泛民主派立法會議員經常話政府引用「有犯罪或不誠實意圖而取用電腦」罪告人，等同「網絡文字獄」，資訊科技界議員莫乃光尋日就喺立法會保安事務委員會提出動議，要求法律改革委員會檢討呢條罪行，以免市民受到無理檢控。點知冷不防建仔議員EQ葛珮帆提出另一項動議，話呢條法例嘅檢控範圍太窄，應該擴闊啲，告多啲利用電腦犯罪嘅人，結果以十五票贊成、十三票反對獲得通過，泛民慘被技術性擊倒，認真無癮。
（設計圖片及對白）
政府喺○八年至去年，曾引用「有犯罪或不誠實意圖而取用電腦」罪提出咗二百九十三宗檢控，結果有八成半，即二百五十二宗被定罪，但莫乃光話政府係偏離咗呢條法例喺九二年立法嘅原意，即係要入侵他人電腦先構成罪行，但依家變咗喺電腦發表一啲言論，都有機會「以言入罪」；白鴿黨劉慧卿話依家直頭好似「網絡砌生豬肉」。
長毛爆粗質疑
獨立議員黃毓民仲激，突然大聲指住保安局代表：「你信唔信耶穌，你唔信耶穌就落地獄，如果我喺網上咁講，係咪已經犯咗法？」「我話你X家鏟係咪同滅門一樣？又算唔算犯法。」之後社民連「長毛」梁國雄即謂：「X家鏟，咁曾鈺成X家都係共產黨員」；又謂自己的電腦經常被國安入侵，着保安局調查。坐喺後排嘅金融界議員吳亮星問長毛「有冇證據？」長毛即叫「姓吳嘅，你X皮啦」；委員會主席葉國謙即警告長毛，再發表有關言論，即要求他離開立法會會議室。
而建仔嘅Ann蔣麗芸發言時，亦被劉慧卿打斷，阿Ann即發火：「你講嘢我唔阻你」，並即時着主席叫劉慧卿收聲，火藥味甚濃，阿Ann繼續發言，話舊年佔領行動期間，有人喺網上號召啲青年人帶武器去衝擊，最細嗰個得十二歲，可見網絡輿論散播速度幾快，要政府加強打擊呢啲網絡罪行。黨友鍾樹根都唔輸蝕，話法例喺九二年立法嗰陣，互聯網都未公開使用，點知依家咁發達，又質疑點解泛民話政府偏離立法原意。
委員會最後以大比數通過由EQ提出嘅動議，要求政府檢討「有犯罪或不誠實意圖而取用電腦」以擴闊範圍，加強打擊使用電腦進行違法行為。
