環保雪種成火種 各自為政累街坊

呢，前年馬鞍山一間酒樓維修冷氣期間，懷疑處理雪種不當，引起大火同爆炸，導致二十一人受傷。事後揭發，原來本港既冇法例規管雪種，亦冇部門負責監管，直情好似無王管咁，你話係咪匪夷所思吖。今時今日樣樣講環保，新一代冷氣機雪種大行其道，表面上係環保，實際上呢啲雪種屬易燃材料，處理不慎隨時爆大鑊o架。年前東莞一間港資紡織廠亦因為維修冷氣機而發生爆炸，造成一死兩傷，相對而言，香港馬鞍山酒樓爆炸冇人死亡，都算不幸中之大幸囉。

最離譜嘅係，港產官僚冇吸取教訓，依然得過且過，到依家仲未加強監管，堵塞漏洞，消除安全隱患，連申訴專員公署都睇唔過眼，主動介入調查。嗱，申訴專員調查發現，當局規管環保雪種機制嚴重不足，加上部門互相卸責，消防處、機電署、環保署及勞工處各自為政，缺乏協調，部門之間甚至對各自規管範圍都存有分歧，宣傳又唔夠，而且亦缺乏針對冷氣技工嘅安全訓練等，可以講係漏洞百出，有乜法子唔出事吖。

正所謂，三個和尚冇水飲，目前規管雪種最少涉及四個部門及四條法例，就好似四個和尚咁，更加唔使旨意有水飲喇。係人都知，港產官僚冇嘢叻，最叻就係卸膊，涉及愈多部門，就愈係冇人負責，大家早就見怪不怪咯。好似近年頻頻發生嘅冧樹慘劇咁，負責管樹嘅政府部門有八個咁多，每年相關開支多達四億元，可惜人多唔係好辦事，反而好累事，卒之又畀審計署省咗一輪。最搞笑嘅係，當年有公屋居民通街晾衫，搞到七國咁亂，好似第三世界國家咁，點知個個部門都詐傻扮懵，冇人肯執法，結果要由政務司司長親自出面統籌，先至有人肯認頭，問你服未。

講番雪種呢筆，簡直係計時炸彈，危機四伏。本報早前調查發現，有冷氣工程公司為慳皮由內地入平貨，唔少平價雪種嘅金屬罐根本唔符合安全標準，壓力過高就會爆炸，都唔好話唔牙煙。咪話太一叮唔提醒，如果港產官僚繼續卸責，雪種隨時變火種，連頭上嘅烏紗帽都燒埋吖，叮！