城中鏡：王敏剛忽變獨眼龍

港區全國人大代表王敏剛變咗「獨眼龍」，原來佢近日做咗白內障手術。王敏剛話一向都有定期做眼科檢查，早兩、三年前得知有白內障，笑言「年紀大、機器壞」，雖然情況唔係好嚴重，但喺朋友極力勸告下，決定搵好友眼科醫生林順潮幫手做微創手術。佢話日前先做左眼，手術翌日已經可以拆紗布，又唔使戒口，滴吓眼藥水就得，過多幾日就會做埋右眼手術，連佢太太都話覺得好少見佢唔戴眼鏡兼變「獨眼龍」個樣，所以要影張相記錄呢一刻喎！