城中鏡：彭芷君助清貧圓夢
金紫荊女企業家協會日前舉行第二屆執委就職禮，港協暨奧委會秘書長彭沖嘅女兒GiGi彭芷君接棒任新主席，上任頭炮就係宣布成立慈善基金。
彭芷君（左二）接棒任金紫荊女企業家協會主席，爸爸彭沖（右二）、香港青聯主席霍啟剛（右一）同到賀。左一為馬天惠。
金紫荊女企業家協會常務副主席林淑怡（右一）、副主席鄭燕華（左二）同副主席彭蘊萍（左一）齊就任新一屆執委，青聯副秘書長林玉茵（右二）到場打氣。
蔡加讚話個人遊旅客大減，五一長假生意大不如前。
GiGi笑言唔使出手揼老友心口，好友已爭相認捐，基金成立後，將撥筆錢做獎學金。佢話雖然香港富庶，但大學學費愈來愈貴，想畢業隨時要花十幾萬元，所以協會將出錢資助經濟有困難嘅家庭，等資優女生安心圓大學夢。
講完大計，成班執委姊妹拉GiGi上台，常務副主席馬天惠預備一份大禮，叫埋GiGi嘅心肺外科專科醫生老公辛光耀企到台前，搞乜咁開心？原來係提早慶祝兩人結婚十周年。辛醫生好怕醜，但喺眾人催促下，當場錫啖太太做賀禮，認真甜蜜。
蔡加讚嘆零售市道差
轉頭見到喜運佳鐘錶集團主席蔡加讚，講起零售市道冷清清，佢都皺晒眉，話香港部分人發起反水貨客行動，令內地豪客銳減；加上歐元同日圓紙水低，去當地購物仲抵過香港。今個五一長假旗下香港店舖生意下跌兩成，澳門市況亦跌五個百分點。市況咁靜佢話只好努力Call客、開源節流，希望遲啲市道有好轉喎。
