政壇：搞搞政：發叔宣布棄選鄉局主席
話說新界鄉議局下月一日就換屆，年屆七十九歲嘅主席劉皇發率先宣布唔再角逐連任。發叔尋日去信鄉議局全體議員同顧問，話有感年事已高，經慎重考慮後，決定唔再尋求競選連任，仲懇切期望有志之士當仁不讓，踴躍參選，帶領鄉議局為鄉民福祉、為香港嘅穩定繁榮，作出更大貢獻。據了解，副主席張學明同林偉強將會連任，扶助發叔「太子」劉業強繼承「新界王」位。
設計圖片及對白
人稱「新界王」嘅發叔喺信函表示，自一九八○年獲選為第二十四屆鄉議局主席，承蒙鄉議局同寅信任有加，鼎力支持，多番連任至今已任職主席達三十五年，因此係時候退下火線。據了解，佢身體近年不復當年勇，雖然平日開會依然中氣十足，相當精靈，但上星期確因身體唔舒服一度入院，更加令佢以健康為由退任嘅傳聞甚囂塵上。
料交棒畀仔仔劉業強
據知發叔決定退任後，已陸續約見二十七鄉嘅鄉頭，希望佢哋睇在自己分上，喺鄉議局事務上扶阿仔劉業強一把，鄉紳亦估計發叔長遠會將其立法會鄉議局功能界別議席交棒畀劉業強。發叔尋日未有現身立會，但就報咗名參加星期日嘅深圳晤京官討論政改會議。我哋分別多次致電發叔父子，但始終未能聯絡上。
事實上，發叔早喺前年已將全國政協委員之位交棒畀劉業強，而阿仔亦接掌負責鄉議局大樓嘅管理，大小活動都頻頻亮相擔任主持，扶植佢慢慢主持大局。由於唔少鄉紳仍好撐發叔，早前二十七鄉更聯署支持佢連任，加上距離選舉截止報名只係剩番兩日，「有志之士」就算呢個時候想角逐都未必趕得切搵齊啲鄉頭支持啦！
