政壇：周澄吳文遠傳閃電分手
喺香港嘅社運圈孕育出唔少情侶，但最終能夠開花結果嘅，真係唔算多。社民連副主席吳文遠同「民主小女神」周澄舊年公開戀情後，曾經成為社運圈子熱話，有網民更催促兩人早日結婚，女方更赴英國出席吳文遠胞弟嘅婚禮。正當大家都以為兩人好事近之際，就收到爆料，話原來呢段戀情已經靜悄悄地結束咗。
吳文遠（右）同周澄傳喺今年初已正式分手。（互聯網圖片）
吳文遠同周澄初初拍拖時，經常將甜蜜合照放上網「放閃」，當時外界都有人睇好這段感情，覺得兩人政治取態相近，應該好快可以拉埋天窗。不過，舊年底周澄要遠赴英國深造，吳文遠則要留守香港參與佔領行動，結果兩人拍拖無耐就要分隔兩地，就算吳文遠不時飛去英國「蜜會」周澄，仍然聚少離多。有確實消息話，兩人喺年初已經分手，閃電結束呢段不足一年嘅戀情。
到底兩人為何分手？原因仍然係個謎。我哋嘗試聯絡吳文遠，但未能成功，而周澄喺社交網站仍然好活躍，最近就去咗瑞士度假，並上載多張同友人嘅合照，表面看來似乎並無因為「甩拖」而影響心情。其實政治同愛情一樣，離離合合好正常，兩人既然無緣成為愛侶或終身伴侶，相信仍係社運路上嘅戰友。
