政壇：KK慢必提問鬥甩轆
每逢施政報告、財政預算案同特首答問大會，一班泛民主派立法會議員唔係掟嘢就係集體離場，但唔知係咪佢哋玩厭咗，定係怕離場減低曝光率，喺尋日嘅特首答問大會冇重演集體離場嘅戲碼。不過，留喺議會都冇好嘢，笑料百出，事關民協KK馮檢基同人民力量「慢必」陳志全先後出錯，真係笑死人。
全體立法會議員獲安排喺嚟緊嘅周日去深圳同京官討論政改，KK日前話會喺見京官時提出「凍結」政改，已經被人質疑抄基本法委員會委員陳弘毅條橋。尋日佢喺答問大會上，竟然撈亂咗全國人大常委會「八三一」決定同政改方案，話「依家民意旗鼓相當，特首會唔會尊重民意，收回『八三一』方案」。特首梁振英隨即反駁話「八三一」方案唔係特首方案，唔係特別行政區政府嘅方案，KK先改口話提交立法會嘅方案。
唔守規矩 主席喝停
其實KK嘅言論相當惹火，一開始發言已點名批評建仔同工聯會「賴貓」、「輸打贏要」同「木頭公仔」，主席曾鈺成多次提醒喺會上指摘議員或政黨，只會引起議員之間嘅辯論，點知KK依然死心不息繼續講，最終要主席大聲喝令佢至停止發言。另外議員發言前，一般要由主席叫名先可起身發問，但KK前後起身六次，其中幾次係未經叫名，搞到主席開口叫佢守規矩，唔知仲以為係老師叫學生守規矩添。
另外有五十六名議員報名上深圳見京官討論政改，部分泛民議員之前已經表明唔會參加，當中包括慢必。慢必尋日就將議員上深圳見京官講錯做上廣州，仲要連錯兩次。梁振英回應時都忍唔住岔開話題，指出深圳同廣州係唔同嘅城市，「廣州唔係深圳一部分，深圳唔係廣州一部分，所以我哋係去深圳，唔係去廣州」。兩位議員尋日犯咗咁明顯嘅錯，真係想兜都難。
