大埔名牌私營老人院舍被踢爆虐待長者喺露天平台「剝光豬」等沖涼,長者尊嚴蕩然無存,引起全城嘩然。查實呢啲醜聞不過係冰山一角咋,以安老護老為名,行虐老欺老之實,就係香港嘅現實嘞。

呢,有院友家屬大吐苦水,指發現長者眼睛無故瘀傷,護老院話係院友自己整親,唔關佢哋事,但醫生就認為似被人打傷,家屬想向院方投訴,又擔心長者遭報復,只好忍氣吞聲。有曾經喺大型院舍工作嘅知情人士踢爆,部分護理員一味貪方便,居然罔顧長者私隱,幫婆婆換尿片唔拉屏風。最奇怪嘅係,有院舍經常估到社署人員巡查時間,提前執靚個環境,就算有問題都發現唔到喇。

呢啲就係問題所在嘞,你估院舍真係可以未卜先知,一早知道當局巡查時間咩。好簡單,正如內地公安掃黃咁,次次都係有人通風報信,到時梗係雞毛都搵唔到條喇。難為勞工及福利局局長張建宗仲話高度關注虐老事件,一經查實,唔排除釘牌喎;又否認社署係「無牙老虎」,過去曾巡查安老院舍四千次,平均每家巡查七次喎。到底係局長呃人,定係局長被人呃,大家心照喇!

其實,社署一年巡查幾千次又點吖,次次走過場,即使發現問題都唔執法,巡查都係嘥氣嘅啫。好似今次涉事院舍咁,收過十五封違規警告信,但一次都未被檢控過,社署仲話唔係無牙老虎?當然喇,社署都有自己苦衷嘅,政府資助宿位供不應求,如果認真執法,封閉違規院舍,點安置受影響長者呢?就好似劏房咁,當局明知違法都唔敢取締,咪就係因為無法安置住戶囉。

講起都幾可悲,香港係全球最富裕城市之一,港府肥到只剩下錢,但寧願做守財奴都唔肯解決安老等民生問題,搞到每年都有數千名長者喺輪候資助院舍期間死亡,等唔到嘅惟有入住私營院舍,而家屬明知長者受虐待,都唔敢轉院,事關天下烏鴉一般黑,轉去邊度都係一樣啫。講到底,政府帶頭虐老,無良業界仲唔有樣學樣咩!

護老院舍人手短缺係另一個問題。講起都冇人信,私人院舍平均一名職工照顧八九名長者,千手觀音都做唔切喇。本來申請外勞係一條出路,弊在政客阻頭阻勢,問題始終無法解決。計太一叮話齋,人人都會老,政府政客夾埋虐老,因住收尾嗰幾年吖,叮!

第一手消息請下載on.cc東網iPhone/iPad/Android/Windows Phone Apps