城中鏡：司徒永富創業有法
創業係條崎嶇路，城市青年商會尋日舉辦第八屆影子企業家開幕典禮，邀請咗幾位有過唔同經歷嘅企業家以過來人身份分享自身體會。鴻福堂總經理兼執董司徒永富教路，創業最忌人云亦云，見到人哋做得好就盲目跟隨，既唔係最先嗰個又唔能夠突圍而出，只會失敗收場。
司徒永富（左）話太太係鄧良順（右）嘅舊同事，兩人認識多年。
時景恒認為創業前要清楚了解市場需求。
楊振強（右）與城市青商會會員潘慧嫺指比賽優勝者有機會與商界名人交流。
曾經從事金融業嘅司徒永富自爆當年過度投資，貪勝不知輸，結果損手而回兼失業，日日戴住條呔扮返工，最終有朋友搵佢一齊賣涼茶，佢焗住應承做住先，而佢太太當時亦唔敢同人講佢係賣涼茶，只係形容丈夫做健康產品生意。
對於想創業嘅年輕人，佢就畀咗幾個貼士，就係唔好用阿媽辛苦錢創業，要好好善用政府資助，同時要愛上自己嘅產品，但切記唔好同股份談戀愛喎。
時景恒：宜先了解市場
時昌迷你倉創辦人時景恒（Kevin）創業之路亦不平坦，曾經試過被員工集體「穿櫃桶底」偷錢，早兩年又試過搞上市觸礁而損失一千多萬元。佢話年輕人創業好多時會有競爭對手，除了要諗方法突出自己外，仲要了解市場需求，好似現時香港住屋單位面積細，市民對迷你倉需求大，因此即使本地有七十多間公司經營迷你倉業務，仍能為市場所容納，生意相對穩定。
香港青年協會督導主任鄧良順指想創業嘅學生不妨先去有興趣嘅行業打幾年工，拓展相關人脈網路，吸取更多經驗，就冇咁易失敗。
