政壇：搞搞政：嫻姐撐懷仔孤軍作戰
工聯會（工記）立法會議員陳婉嫻（嫻姐）協助匿藏香港九年嘅懷仔，並為其爭取居港權及就學機會，引起各界關注。事件更由本土資源之爭，提升至人道問題，但今次無論泛民、建制以至嫻姐所屬嘅工記都袖手旁觀，四顧無人，嫻姐只好獨力死頂，講到尾，都係政治立場累事。
（設計圖片及對白）
呢宗無證兒童逾期居港案並唔罕見，無論建制、泛民過去都有社福界人士幫助呢類「小人蛇」個案，只係大家都會低調進行，私底下先向入境事務處等政府部門「叩門」，傾唔掂，才利用輿論向政府施壓，但嫻姐一開波就大鑼大鼓，有社福界人士質疑嫻姐想攞威。社福界議員張國柱日前就話，呢啲個案每日都有，只係冇人知，仲奇怪行走政壇咁多年嘅嫻姐唔知。
避中港議題 建制唔插手
有資深社工就指出，畀懷仔返學，係因為香港已簽署《公民權利及政治權利國際公約》，懷仔有就學權利。至於今次大家都唔出手，有指選舉臨近，建制唔想捲入極具爭議嘅中港問題，泛民又基於「對家」出事，講少句，無謂畀本土派多個話柄。只不過，泛民議員張超雄及張國柱迄今聲都冇聲，同佢哋過去嘅定位好唔同囉，只可以話，當議題被政治化，連人道嘅大原則都要「靠邊」。
