政壇：沈慧林擴廠港製「陀飛輪」
近年唔少企業都將廠房移師到越南、柬埔寨等地，以降低生產成本，但「港版陀飛輪」品牌萬希泉創辦人沈慧林（William）就反其道而行將工業回流，擴充其位於柴灣嘅原有辦公室，將所有設計、組裝等工序帶返香港進行，盡量做到完全「香港製造」。
沈慧林將柴灣辦公室擴充成為廠房，直接生產「港版陀飛輪」。
其實過往William都有一班員工於香港辦公室專責設計、品質鑑定及部分組裝工作，但礙於空間及配套，員工只係喺設有吸塵設施嘅工作枱面上裝嵌零件，嚟緊新廠房下月開始啟用後，就方便得多喇，由於設有吸塵房等專業設備，員工入內後便可直接進行裝配。
自細受爺爺及父親收藏古董木雕興趣所薰陶嘅William，對木材情有獨鍾，除將約二千呎新廠房以木飾裝潢為主外，仲研究緊將木雕圖案概念及故事融入陀飛輪錶面設計。另外，由於現時鐘錶行業請人困難，佢哋就派過一啲員工去學習相關技術，希望直接培訓更多新血。
