政壇：郭偉強夫婦落區晒恩愛

立法會勞工界議員郭偉強結婚三個多月，但唔少街坊可能唔知情，仲話要介紹女仔畀佢識添，郭偉強急急澄清已結婚之餘，仲帶埋太太落區家訪見街坊。佢話，通常九點半鐘完咗家訪先有飯食，原本想叫太太自己食先，但太太就寧願陪佢一齊家訪後再撐枱腳，認真恩愛。郭偉強話，多謝太太陪佢家訪，令佢同街坊之間又多個話題。

郭偉強（右）帶埋太太落區家訪，相信唔會再有街坊介紹女仔畀佢識。（受訪者提供圖片）

話說喺家訪期間，唔少公公婆婆見到郭太都好開心，仲叫佢哋快啲生小朋友添！而郭偉強計計數，自己今年三十七歲，年紀都已經唔細，又好鍾意小朋友，覺得都係時候要生育，雖然生仔生女無所謂，但仍覺得生女好似孝順啲。

好多人擔心生個小朋友要使成幾百萬，但係郭偉強就無有怕，話父母都係「粗生粗養」佢，佢都可以繼續「粗生粗養」下一代。

不過，就算生都係一個起兩個止，因為平極都有成本喎。