科技日日新,當大家仲喺度追趕IT(資訊科技)嘅潮流時,唔少人已經去咗開拓DT(Data Technology,即數據科技,也有稱大數據)。尋日阿里巴巴主席馬雲去貴州同騰訊嘅馬化騰,小米嘅雷軍等一班互聯網大佬開峰會,席間,馬雲就講DT,連佢都話自己要抖大氣啊。

馬雲感嘆依家已經由IT時代行緊去DT時代。(資料圖片)

馬雲自爆,早排爭啲畀六個嚟面試嘅後生仔考返轉頭,事緣當時嗰幾個後生仔搬啲大數據出嚟,講互聯網模式,連馬雲都話唔多聽得明,只好感慨好彩自己喺十五年前創業,否則一定畀呢班後生「活活搞死」。

雖然係咁,馬雲都話依家係由IT時代行緊去DT時代:「未來三十年是人類社會最精彩的三十年,亦是令人恐慌恐懼的三十年」,因為大數據不但涉及商業,亦影響成個社會,而且未來的製造業要的不再是石油,它最大的能源是數據。唔明?舉例喇,facebook上,大家都畀過like啩,每個like都係錢,fb就係收集用戶like邊啲post,預測用戶喜好,再畀啲你啱睇嘅廣告。所以馬雲話「IT時代是通過對昨天訊息的分析掌控未來,而DT時代是去創造未來」。

第一手消息請下載on.cc東網iPhone/iPad/Android/Windows Phone Apps