政壇：阿基抄橋 籲「凍結」政改
泛民陣營有個飯盒會嘅溝通機制，尋日一眾泛民為周日上深圳同京官會面再碰頭，事後，循例係由飯盒會召集人公布會議結果，但民協馮檢基（阿基）就大口一開，扮晒召集人咁搶閘見傳媒，跟住大講自己對政改同見京官嘅睇法，仲提咗個「凍結」政改兩、三年嘅建議出來，話會喺會面中向京官提出喎，其實，類似嘅建議早有基本法委員會委員陳弘毅提咗啦，阿基係咪抄橋呢？
（設計圖片及對白）
陳弘毅早前建議政府撤回政改，等明年立法會選舉後，再交回新一屆立法會審議及表決，言下之意，就係等選民喺立法會選舉踢走泛民，等政改方案可以通過，可以如期一七年普選特首。雖然陳弘毅嘅建議被建制派冷處理，泛民甚至有人形容係「嚇咗一跳」。不過，阿基竟然橋唔怕舊，只係改咗名話要「凍結」政改，甚至仲話等兩、三年後先再討論，即係話一七年仍要維持泛民口中嘅「小圈子選舉」，仲衰過陳弘毅嘅建議。
擬向京官提出 被批多餘
阿基解釋，依家唔止泛民同中央互不信任，香港市民對內地亦不信任，加上香港同內地對「一國兩制、高度自治、港人治港」有不同認知，認為再處理政改，只係綁多個死結。如果互信同認知呢兩個結解開，政改難題亦都可以解決咁話。
立法會議員獲邀喺周日上深圳見京官傾政改，已經有五十六位議員報名出席，當中包括阿基同另外十三位泛民議員。阿基就話屆時會將「凍結」政改建議向有關官員提出。不過，阿基尚未向京官發表佢嘅真知灼見，已經有建制派大潑冷水，直斥阿基嘅建議係多餘同混淆視聽，令事態更複雜。
