殭屍網站冇人吼 浪費公帑醜上醜
內地近日整頓政府網站，發現各地有唔少官網內容長年冇更新，管理維護亦欠奉，有啲甚至三年冇更新過，名副其實「殭屍」網站。咪以為呢啲只係神州「特產」吖，原來港府網站一樣咁Hea，唔怪得「門」可羅雀冇人吼咯。
有幾Hea？嗱，好似申訴專員公署網頁咁，上載資訊平均一個月一則咁大把，而且大部分係流水帳式嘅活動詳情，或者枯燥無味嘅新聞，搵鬼睇咩。商務及經濟發展局轄下創意香港專責辦公室嘅社交網站專頁仲離譜，開設四年，點讚只有一千多啲，醜死怪。前排舉辦香港電影金像獎頒獎禮，相片喺活動結束四日之後至擺上網，舊聞充「新聞」不特止，最搞笑係，點讚嘅居然包括辦公室幾個官員，真係唔慌唔夠「創意」咯。
又譬如，政府新聞處年初上載兩條探討本港住屋問題嘅宣傳短片，至今三個月，瀏覽量已經過十萬，齋睇數字唔算少，但dislike（不喜歡）居然超過八千個，唔使問阿貴，梗係好惡頂喇。兩條片製作費高達三十六萬元，但網友睇完都唔知噏乜，仲以為係小學生嘅電腦功課。有大學電影學院兼職導師直頭批評短片「失敗」，最多評C級，用十分之一製作費拍出嚟嘅作品都好過佢哋。
網頁質素低劣冇人吼，各部門近年推出多個手機應用程式(App)，下載率同樣低到冇朋友。呢，漁護署App舊年下載只有十幾次，教育局「優質教育基金」App，僅有二百幾次下載，但日常維護開支就要十三萬元，投入奇高，效果超低，根本就係盞搞！有資訊科技界立法會議員批評得啱，政府社交網站讚好人數唔合格，浪費公帑之餘，亦冇好好利用網上平台同市民溝通。
政府使大筆公帑建立網上平台，宣傳政策措施同部門形象，達唔到應有效果反而丟晒架，直頭係捉蟲喇。無他嘅，港產官僚嘅心態就係，年晚煎堆，人有我有，話之你啱唔啱口味，開咗個網頁，推出個App，之後就關人個關！
港產官僚冇樣掂，至叻阿茂整餅，冇嗰樣整嗰樣，仲要好學唔學，學埋內地官員弄虛作假嗰套。無論網頁又好，Apps也罷，都唔係第一時間為市民提供最新資訊，最佳服務，唔被唾棄至奇喇。計太一叮話齋，政府網上平台變成聾耳陳隻耳，得個睇字，想市民畀個讚？想有宣傳效果？發夢都冇咁早就真，叮！
