立法會日夜拉布，一班政治助理好多時都要輪流留守喺立會，以防出現流會。好似民政事務局政治助理徐英偉就不時喺立會跟出跟入，睇實班建制派議員係咪夠人，仲要不停聽點人嘅鐘聲，呢啲工作唔易頂。但佢有佢一套解抑鬱良方，就係每個星期日都帶住兩名寶貝仔出街，因為一見到兩個仔開心，就乜嘢悶氣都自然消失。

徐英偉話放假一定會抽時間陪兩個仔出街，享受天倫之樂。（徐英偉提供）

尋日天氣唔太好，下午天文台仲發出黃色暴雨警告訊號。不過，徐英偉一家大細照出街玩，原來佢每周都一早計劃咗帶兩個仔去邊，好似尋日佢哋一家四口就去咗藝術館玩足半日。

但香港地咁細，個個星期出街搵節目，唔怕重複咩？徐英偉話唔驚，因為自己做開民政事務局，知道康文署轄下好多博物館同藝術館，不時有新主題展覽，所以就算去番同一地方，實有新嘢睇，唔會悶喎。

第一手消息請下載on.cc東網iPhone/iPad/Android/Windows Phone Apps