已故「針織大王」羅定邦後人一向作風低調，不過做善事就例外。尋日羅定邦長子羅樂風偕太太羅蔡玉清現身深水埗，為家族旗下嘅宏施慈善基金嘅活動主持啟動禮。咪以為羅氏後人個個都含住金鎖匙出世，身為基金董事會主席嘅羅樂風自爆，當年佢都係新移民，仲住過深水埗徙置區，所以對區內新移民特別關心。

郭振華（後排左）與新來港家庭小朋友參加啟動禮。

低調嘅羅樂風夫婦為慈善現身。

難忘深水埗艱苦歲月

為咗扶持新來港婦女同兒童，宏施喺舊年七月開展為期三年嘅「扶新苗．助成長」計劃，向深水埗區內新移民家庭提供免費借書、興趣班同媽媽支援組等服務，已有逾四百個家庭受惠。尋日特別為計劃舉行啟動禮，深水埗區議會主席郭振華同受惠街坊都有到場。

羅樂風話六歲時同父母由廣州來港，最初就住喺深水埗。當年居住環境差，打風都驚屋頂吹咗去，之後仲遭逢石硤尾木屋區大火，於是入住徙置區。羅樂風講起當年痛失家園嘅情景感觸良多，慨嘆佢一生之中最窮、最艱苦嘅歲月，都喺深水埗度過。

自己做過新移民，捱過窮，難怪佢瞓身幫助新來港人士。佢話近年社會唔少人歧視新移民，佢最擔心小朋友受影響，缺乏自信心，所以推出支援計劃為佢哋送上正能量。講講吓，郭振華話自己亦住過徙置區，原來同羅樂風係鄰居添！

上個月羅定邦孫女羅君兒被綁架，近況如何？身為君兒大伯嘅羅樂風話，事發後君兒好少見親戚，所以唔清楚佢嘅實況，但希望大家畀多啲空間姪女喇！

第一手消息請下載on.cc東網iPhone/iPad/Android/Windows Phone Apps