政壇：搞搞政：工聯會缺新血選戰危

吳秋北循例禁參選

工聯會唔夠新人上位，或多或少同自己嘅規條有關。例如工聯會內部規定，勞工界功能界別議席只可做一屆，完成四年任期就要換人。如果想繼續做議員就要挑戰直選。但睇番工聯會咁多年嚟參加直選嘅戰績麻麻，除咗王國興成功勝出之外，其餘好似葉偉明、潘佩璆都未能打破敗選嘅宿命。

現任兩名勞工界議員郭偉強同鄧家彪，形勢一樣咁危危乎。郭偉強面臨來屆港島選區減一席嘅現實，選情雪上加霜。至於想轉戰新界東嘅鄧家彪，喺建制派爭崩頭嘅情況下加入混戰，相信贏面都唔大。

咁不如引進新人？近排言論好惹火嘅理事長吳秋北原本都夠人氣去參選，但工聯會規定理事長一做就要做足九年，吳秋北啱啱做第二屆理事長，若呢個規定唔改，即意味佢將同下年嘅立法會選舉擦身而過。

雖然工聯會號稱四十歲或以下嘅會員佔過半數，聽落好似唔愁冇新血，但依家新一代多數唔願意全職服務工會。就以剛過去嘅五一大遊行為例，絕大多數參與遊行者都係比較基層嘅一群，好多仲帶埋老婆仔女出嚟，但就好少專業人士露面。長此下去，相信唔止選舉頭痕，連工會運作都可能有問題。