政壇：陳倩揚創業如生第三B
前港姐陳倩揚近日榮升老闆，投資近百萬創立自家品牌護脊產品，現階段以網店形式出售，推出不足一個月已獲圈中好友力撐。今年一月初誕下幼子陳羲穎嘅倩揚，除咗忙於照顧家庭同埋積極收身復出幕前外，亦想向大家證明仍然能夠創出一番事業。佢話：「其實近年一直都好努力推廣健康生活，賺錢暫時仲係其次，自己懷孕期間腰部經常會酸痛，希望可以幫助更多有需要嘅人，加上都想話畀大家知就算做咗媽媽，你心入面一直想實行嘅，只要肯把握同努力都可以做得到。」
陳倩揚搵埋老公做生招牌。
倩揚話自家品牌係繼兩子後第三個B。
倩揚透露品牌籌備咗近一年多，當時咁啱懷第二胎，故品牌為第三個BB，慶幸創業過程尚算順利：「當時已經想正式推出產品，但始終覺得慢工出細貨，想品質可以做到滿意為止，其實都覺得幾得意，因為細佬好似一路陪住品牌誕生咁。」咁怕唔怕會忽略咗小朋友？佢話：「我同老公盡量會做到兩邊平衡，返到屋企喺小朋友面前就唔會傾公事，等佢哋熄燈瞓晒覺，先會喺床度努力傾盤生意。」另外，任職科學家嘅老公陳浩然不時都畀專業意見同協助，仲「處男下海」擔任示範模特兒，成為咗倩揚繼續力拚嘅原動力。
