政壇：泛民單車騷影完相鬥鬆
話說由泛民主派發起、一連八星期嘅「反袋住先」活動進入第四周，尋日朝早十一點，一班泛民議員諗住踩單車沿途派單張，喺樂富起步時共有七名議員，但係一影完相、做完騷，啲人就陸續喺中途離隊閃人，最終只得新同盟范國威同今次搞手白鴿黨胡志偉堅持到最後，真係有頭威無尾陣。
李卓人踩單車前戴上頭盔，以免再次知法犯法。
胡志偉一馬當先，其他人全部唔見影。
袋巾傑踩幾步「跳車」
泛民一行約二十幾人，出發前先用單車衝過印有「八三一」框架嘅橫額，然後喺胡志偉帶領下上路，點知街工梁耀忠一影完相就放低架車，踩都無踩過。更加搞笑嘅係，成班踩單車嘅議員慢吞吞，完全跟唔上志偉，後來竟然用大聲公召回志偉，好離譜。車隊原本要經過四個街站，但係公文袋「袋巾傑」梁家傑同工黨李卓人做樣踩幾步就「跳車」，結果去到終點得番兩個人。
其實，泛民選擇同道路有關嘅宣傳活動都幾冒險，事關早兩星期前，李卓人將身體伸出行駛緊嘅私家車外嗌咪宣傳，違反道路安全守則。泛民今次仍然選擇喺公路踩單車，唔通見過鬼都唔怕黑？
