政壇：翟少籲泛民咪一步登天
呢幾日係長洲太平清醮，今日更加會有一年一度嘅盛事——搶包山比賽，有「公職王」之稱嘅監警會前主席、最低工資委員會主席「翟少」翟紹唐尋日出席電視節目時，就以熱爆嘅搶包山比喻政改，話唔可以因為唔喜歡最下層嘅包，就堅持只拎放喺包山最頂層嘅包，勸告泛民主派爭取普選，唔可以一步登天。
設計圖片及對白
泛民口口聲聲話唔會支持全國人大常委會「八三一」框架下嘅政改方案，而呢幾日多位中央官員亦先後開腔，講明政改方案冇修訂嘅餘地，日前仲有消息話全體七十名立法會議員獲安排喺本月三十一日到深圳，與多名中央官員會面，但泛民仍未決定是否赴會，但咁係咪能夠令泛民「華麗轉身」對方案「袋住先」？政圈內都唔樂觀。
本身係資深大律師嘅翟少承認，自己都唔係好鍾意目前嘅政改方案，不過「千里之行，始於足下」，如果唔踏出去就無法向前走。佢呼籲市民先接受「袋咗先」，之後先評定方案好壞，又話社會若然拒絕接受今次提出嘅方案，睇唔到未來五至十年有機會爭取到更好。所以佢呼籲社會向前行一步，拎出勇氣接受新嘅政改方案。
嘆港淪四小龍之末
翟少又話，喺人大「八三一」框架之下，提名委員會嘅組成方法仲有好大嘅修改空間，問題係過去大家都冇把握機會討論。佢慨嘆香港喺過去幾年嘅發展停滯，已淪為「亞洲四小龍」嘅龍尾，畀韓國同新加坡超越，但係議會卻花大量時間喺爭拗。佢勸喻泛民應該喺今次政改嘅基礎之下，思考點樣優化未來嘅政改方案，會更有建設性。佢又希望立法會議員本月底喺深圳同中央官員會面時，能夠真誠討論、尋求共識。如果唔係，香港嘅政治問題一日不能解決，其他方面嘅發展亦都會寸步難行。
