新界社團聯會（新社聯）日前舉行三十周年聯歡酒會，主人家新社聯理事長陳勇被傳明年可能會參選立法會「超級區議會」議席，佢回應自己最近差唔多每兩日就走勻新界九個區，仲整壞咗兩架車添，好彩係二手車啫。咁係咪有暗示呢？
但陳勇轉頭又話，自己擔當「執波仔」同後衞角色，專門負責為前面嘅人補位，補咩位都冇乜所謂喎。
新社聯副總幹事李世榮就話，佢哋將會派重兵參選年底嘅區選，遲啲公布詳情。咁會唔會同鄉事派對撼呢？佢話鄉議局副主席張學明本身係新社聯榮譽會長，相信唔會有問題喎。
