政壇：長毛嘲何柱國窮到剩係有錢
社民連立法會議員「長毛」梁國雄、人民力量成員譚香文同「快必」譚得志等數十名示威者，喺本月十五日趁政務司司長林鄭月娥出席「星島第三十屆全港校際辯論比賽」時踩場示威。星島集團轄下嘅《星島日報》同《英文虎報》，近日向上述三人發律師信索償。長毛回應話唔明白呢單嘢有乜好訴訟，批評星島集團主席兼全國政協常委何柱國唔講理，「窮到剩係有錢」。
《星島》向梁國雄等衝擊辯論賽人士發律師信索償，梁反嘲何柱國「窮到剩係有錢」。（資料圖片）
梁國雄
當日數十名示威者分散坐喺比賽會場內，等到林鄭月娥入場後就喺座位上高舉黃傘同示威牌，又不斷高叫口號，部分人仲用埋揚聲器添。最奇怪嘅係，當時在場嘅星島高層同人員未有即時採取任何行動，直至其後譚香文離開座位，走到林鄭身後作近距離抗議，並一度用示威牌遮住林鄭塊面時，在場保安人員先出手保護林鄭，但始終未有趕走上述三人。
點知星島日前突然透過旗下報章宣布，佢哋已經就事件報警。星島之後仲向長毛等三人發出律師信，要求佢哋就事件作出賠償，以及承諾唔會再喺星島日後舉辦嘅活動上示威。
被人告慣嘅長毛尋日就喺立法會反駁，擾亂秩序唔一定會造成損失，又強調好多人都針對過林鄭踩場示威，佢唔係第一個，睇唔到星島有乜理據向佢索償，仲譏諷何柱國「講道理又唔識講，窮到剩係有錢」，只識用錢請律師發信對付示威者，搞到香港好似變咗新加坡咁。佢認為如果何柱國怕有人踩場示威，一早就唔應該請林鄭等高官到場主禮「擦鞋」喎。
