油價插水照收費 民航官僚不作為
「天氣不似預期，但要走總要飛」，每次聽到呢首歌，大家除咗諗起坐飛機之外，仲會諗起乜嘢？冇錯嘞，諗起燃油附加費，近年國際油價大幅回落，內地今年二月已取消客運燃油附加費，偏偏香港仍然收到足，問你服未。
係人都知，民航處○三年開始設立航空客運燃油附加費，理由係油價波動，航空公司經營成本大增喎。好嘞，眨吓眼十幾年過去，油價近年持續插水，由高峰跌咗一半有多，繼續收取附加費到底合唔合理呢？嗱，煤氣公司今年初因為國際油價大跌而減費，返番去十年前嘅收費水平，就知道航空公司繼續收取燃油附加費唔合理喇。
正所謂，民意不可欺。有團體最近進行問卷調查，多達九成八人贊成取消燃油附加費。正如調查團體話齋，內地都停止有關收費喇，民航處有乜理由今年四月仲批准航空公司將費用上調一成五呢？仲有冇荒謬啲吖？
仲有呀，民航處批准各家航空公司收費劃一，只以長短途區分，難聽啲講句即係合謀定價，導致唔同航程徵費居然相同，例如飛東京同飛廈門一樣收咁多錢，根本反映唔到實際用油量。再講吖，家陣航空公司預訂機票嘅時間愈來愈早，隨時一年前賣定一年後嘅機票，即使出發日同售票日嘅油價出現明顯差距，航空公司都唔會退回差額，對消費者根本唔公平。
冇錯嘞，民航處話就話會定期檢視燃油附加費，亦唔係冇試過下調，之但係下調水平跟唔上國際油價跌幅，點講都係航空公司着數晒。正如關注團體話齋，燃油附加費一直由民航處單方面審批，從來冇向公眾交代當中準則，同黑箱作業冇分別。最好笑嘅係，民航處身為監管機構，居然好似黃大仙咁，對航空公司有求必應，十年來審批嘅六千份申請中，只有三百份獲批徵費水平低過原先申請，話民航處係橡皮圖章，一啲都冇誇張。
冇計喇，民航處官僚大花筒就叻，叫佢哋做好監管把好關喎，盞嘥氣嘅咋。呢，莫講話航空公司燃油附加費無王管吖，車用汽油及柴油咪一樣加快減慢，咁多年來，消委會、運輸業界以及車主講到口水都乾埋，要求監管「油魔」，港府一直關人個關，任由市場長期被油公司壟斷。所謂民生無小事喎，大隻講嘅咋，信佢一成，雙目失明吖，叮！
