城中鏡：發叔收牌匾唔講連任
新界鄉議局將喺六月換屆，究竟劉皇發會唔會再選？一班鄉紳上月聯署要求發叔連任，發叔尋日就喺執委會上多謝大家嘅心意，話會慎重積極考慮喎。但話最近健康唔理想，中氣不足，唔想講咁多，希望大家明白佢嘅心意。
鄉議局換屆在即，一班鄉紳尋日向劉皇發（前中）送上「功高譽隆」牌匾。
除咗聯署外，鄉議局班委員連同二十七個鄉事委員會尋日仲送咗一塊「功高譽隆」牌匾畀發叔，多謝佢對於協助訂立《基本法》第四十條，維護新界人傳統權益嘅貢獻。不過，換屆敏感時刻送塊咁嘅牌匾，好易令人誤以為發叔唔再連任。據聞仲有段小插曲，原本呢塊牌匾係打算在本月初舉行嘅《基本法座談會》上當面送畀發叔，但因為當日出席嘅嘉賓個個都舉足輕重，淨係送畀發叔會好尷尬，於是改喺尋日先送贈。
