九龍樂善堂尋日舉行就職禮，新主席梁紹安接棒後就諗咗個新措施，凡一升任做副主席，就要開始供一份五年期嘅人壽保險，事關由第四副主席升到做主席共需五年時間，受益人當然係樂善堂啦！剛升做副主席嘅「暗瘡剋星」Jackeline楊小玲係首批實行者之一，而梁紹安就帶頭一次過供夠五年，等明年卸任後就可以留番一份心意喺堂內喎，相當有意思。

梁紹安（右）接替羅永順成為九龍樂善堂新任主席。

施家殷（左起）同羅詠詩非常老友，又介紹飲食界陳嘉華加入做新總理。

楊小玲（左）話堂內好多成員都係香港聖約翰救傷隊成員，所以該隊副總監潘新標都有捧場。

樂善堂向來亦有個特別傳統，就係當主席落莊之後，並唔係立即抽身變顧問或名譽主席，反而係擔任司庫、稽核等職責，繼續落手落腳幫個堂做事。剛卸任主席嘅羅永順就解釋，咁樣做唔單止對於交代下屆職務更方便，計劃每一屆政策時都可以長遠好多，唔使硬繃繃焗住構思一年內要完成嘅計劃。

多新血 活力足

樂善堂今年多咗唔少新面孔，原來堂內有唔少成員都係由上一代傳承落去或由好友介紹加入，所以成員之間關係就十足一個大家庭咁，主席梁紹安先父梁泳釗就曾經做過樂善堂前主席，而總理羅詠詩則由前主席鄺祖盛介紹加入。至於副主席施家殷亦好幫手，一口氣推介十七個新總理加入幫手，等堂內多啲新血同活力。

第一手消息請下載on.cc東網iPhone/iPad/Android/Windows Phone Apps