政壇：陳弘毅獻計逐泛民過政改
基本法委員會委員陳弘毅早前提出政府可先撤回政改方案，直至明年立法會選舉後，如果屆時有三分之二議員支持方案先再提出，咁樣就可繼續喺一七年落實普選特首喇！雖然政府同建制派都反應冷淡，但佢尋日出席白鴿黨主席劉慧卿網台節目時繼續推銷。佢話雖然坊間好多民調，但並非每位市民均有機會受訪，民間收集簽名行動亦唔夠嚴謹，而香港又唔能夠進行公投，所以最好係透過立會選舉用選票發聲。
陳弘毅向卿姐硬銷立會改選後先至通過政改。
陳弘毅仲話泛民喺一二年立法會選舉取得約五成半支持，但當時未有人大「八三一」決定同政改方案，所以唔知到當時投票畀泛民嘅選民依家係咪仲支持泛民，佢哋嘅意見係「無門表達」，而選票就係最有效方法。對於卿姐質疑時間上好緊迫，佢就解釋，特首選舉唔一定要喺一七年三月舉行，而提委會組成至選出特首大約需要五、六個月時間，如果明年九月新一屆立會產生後通過方案，再用兩、三個月進行本地立法程序，仍可趕及一七年六月普選特首，新特首就可如期在七月一日上任。
卿姐對陳弘毅嘅建議嚇咗一跳，話開頭以為佢係想爭取多啲時間畀政府改善方案，但原來係想反對派喺立會選舉輸晒，等政改可以通過。
